စစ်တွေမြို့တွင် လုံခြုံရေးတင်းကျပ်ချထား
မင်းနိုင်သူ / ၂၄ သြဂုတ် ၂၀၀၉
ရခိုင်ပြည်နယ်၏မြို့တော် စစ်တွေမြို့တွင် ယခုရက်ပိုင်းများအတွင်း လုံခြုံရေးတင်းကျပ်စွာချထားကြောင်း သိရသည်။
စစ်တွေမြို့၏ အထင်ကရ သာသနိက အဆောက်အဦများတွင် လုံခြုံရေးယူထားခြင်းဖြစ်ကာ လုံခြုံရေးယူသည့် ရဲများ သာသနိက အဆောက်အဦများအတွင်း၌ပင် နေထိုင်စားသောက် အလောင်းအစားဝိုင်းများ ထောင်နေခြင်းကြောင့်လည်း ဒေသခံလူထု စိတ်အနှောင့်အယှက်ဖြစ်ကြရကြောင်း စစ်တွေမြို့ခံတဦးက ပြောသည်။
၎င်းက “လောကနန္ဒာဘုရားကြီးထဲမှာလည်း ရဲတွေလုံခြုံရေးယူထားတာကြာပြီ။ စားတော့၊ သောက်တော့လည်း ဘုရားပေါ်။ နေ့ခင်းဘက် လူနည်းပါးချိန်ဆို လုံခြုံရေးရဲတွေက ဖဲဝိုင်းထောင်ကြနဲ့။ သာသနိကအဆောက်အဦနဲ့ ဘယ်လိုမှကို မသင့်တော်တာ” ဟု ပြောသည်။
စစ်တွေမြို့ရှိ အထင်ကရနေရာများဖြစ်သော ဦးရဲကျော်သူကျောင်း၊ ၀င်္ကဘာကွင်း၊ အတုလမာန်အောင်ဘုရား၊ လောကနန္ဒာ ဘုရားနှင့် ဦးဥတ္တမပန်းခြံတို့တွင် ရဲများလုံခြုံရေးယူထားသည်မှာ တလကျော်သွားပြီဖြစ်ကြောင်း ဒေသခံများက ပြောသည်။
“အခုရက်ပိုင်းမှာ လုံခြုံရေးအင်အားတိုးလာတယ်။ စက်တင်ဘာအရေးအခင်း နှစ်ပတ်လည်နီးလာလို့ ထင်တယ်။ တဘက်က လုံခြုံရေးအင်အားတိုးချထားသလို တဘက်ကလည်း တိုင်းမှူးက မြို့ထဲရပ်ကွက် (၄) ရပ်ကွက်ကို (၂၄) နာရီ မီးပေးမယ်ဆိုပြီး စည်းရုံးနေတယ်” ဟု အဆိုပါစစ်တွေမြို့ခံက ဆက်လက်ပြောဆိုသည်။
ဥဒါန်း၊ ပြည်တော်သာ၊ ပလုတ်တောင်စသည့် မြို့တွင်းပိုင်းကျသည့် ရပ်ကွက်များတွင် လျှပ်စစ်မီး (၂၄) နာရီ ရယူလိုသူများအား စာရင်းကောက်ယူနေသော်လည်း မည်သည့်နေ့တွင် (၂၄) နာရီ မီးစရမည်ကိုမူ ရပ်ကွက်အာဏာပိုင်များက မပြောနိုင်ကြောင်း သိရသည်။
“လျှပ်စစ်မီးရမယ်ဆိုမှတော့ လူတိုင်းလိုချင်တာပေါ့။ စာရင်းတောင် ကောက်နေစရာမလိုပါဘူး။ ဒါပေမယ့် ဘာကြောင့်မှန်း မသိဘူး စာရင်းတောင်းယူတယ်” ဟု မြို့ခံက ပြောသည်။
ရန်ကုန်တွင်၂၀၀၇ ခုနှစ် စက်တင်ဘာအရေးအခင်းအပြီး စစ်တွေမြို့မှ သံဃာတော်များက ပတ္တနိက္ကုဇ္ဇနကံဆောင်ပွဲများ ဆက်လက်လုပ်ဆောင်ခဲ့မှုကြောင့် စစ်အာဏာပိုင်များက စစ်တွေမြို့ကို ပိုမိုအာရုံစိုက်လာသည်ဟု စစ်တွေမှ သံဃာတော်တပါးက မိန့်သည်။
“တဘက်က ဒေသဖွံ့ဖြိုးရေးလုပ်ပါတယ်ဆိုပြီး ပြဖို့ ရထားလမ်းဖောက်တာတွေ၊ စာကြည့်တိုက်ဖွင့်တာတွေ၊ သတင်းစာတိုက်ခွဲ လာလုပ်ပေးတာတွေနဲ့ စည်းရုံးရေးလုပ်နေတယ်။ တဘက်ကလည်း လုံခြုံရေးကို တိုးချထားတယ်။ တကယ်တမ်းမှာ ဒေသခံလူထုက ဆင်းရဲကျပ်တည်းဆဲပဲ။ ဖိနှိပ်မှုတွေရှိနေဆဲပဲ” ဟု အထက်ပါသံဃာက ဆက်လက်မိန့်ဆိုသည်။
စစ်တွေမြို့ လုံခြုံရေးကို ယခုရက်ပိုင်းများအတွင်း ပိုမိုတင်းကျပ်ထားရာ အခြားမြို့များမှ စစ်တွေမြို့သို့ လာရောက်သည့် ကားများ ညနေ (၆) နာရီကျော်လျှင် စစ်တွေမြို့တွင်း ၀င်ခွင့်မရဘဲ မြို့ပြင်မှာသာ အိပ်ကြရကြောင်း၊ စစ်တွေမြို့သို့ လာရောက်သည့် ရဟန်းသံဃာများကိုလည်း စစ်ဆေးမေးမြန်းမှု များပြားနေကြောင်း သိရသည်။
http://www.khitpyaing.org/news/Aug09/240809c.php
Monday 24 August 2009
စစ်တွေ
Subscribe to:
Post Comments (Atom)
No comments:
Post a Comment